مقال جميل من المصريون

الدين العام .. سبب الجبايه وتدنى الخدمات

ممدوح الولى   |  08-12-2010 23:48
* * حسنين : سمعت وزير الماليه بيقول إن الدين العام تراجع . وعجز الموازنه تراجع . وخلال سنوات قليله الأمور كلها ها تتحسن خالص .
= = = محمدين : تعرف إن أخطر مشكله تخص المواطن العادى . هى موضوع الدين العام بتاع مصر . الناس فاكره إن المسأله تخص الحكومه . رغن إن هما اللى بيدفعوا الثمن . كل يوم .
سواء فى التعليم الفاشل بالدروس الخصوصيه . أو فى المستشفيات التعبانه بالعلاج الخاص . أو فى حوادث الطرق والقطارات وزحام المواصلات وطوابير تراخيص المرور .وغيرها من الطوابير .
ياسيدى : المفروض إن الدين العام ده متكون من حاجتين . الدين المحلى والدين الخارجى .
* * حسنين : إيه بقى الدين المحلى ؟ كل شويه يقولوا فى التلفزيون الدين المحلى نزل . الدين المحلى نزل .
= = = محمدين : الدين المحلى دا الدين إللى على الحكومه .
* * حسنين : ( مندهشا ) نعم ! وهى الحكومه مديونه زينا ؟
= = = محمدين : الحكومه بقالها سنين طويله عندها عجز فى الموازنه بتاعتها . يعنى الفرق إللى بين ايراداتها ومصروفاتها . دا حتى العجز دا وصل 191 مليار جنيه السنه إللى إحنا فيها .
* * حسنين : علشان كدا الحكومه بتستلف . ودى بتستلف منين ؟
= = = محمدين : شوف زى أى رب أسره دخله أقل من مصاريفه . يقوم يشترى على النوته من البقال أو الجزار أو اللبان . أو يستلف من واحد صاحبه أو يعمل قرض من بنك . نفس الحكايه الحكومه بتستلف من البنوك . من البنك المركزى . من الخارج . من السوق المحلى .
يعنى تصدر حاجة إسمها أذون الخزانه بكذا مليار جنيه بفائده حوالى عشره فى الميه . تقوم البنوك والناس الكبار جوا وبرا يشتروها ويعطوا الحكومه فلوس بقيمتها . كمان الحكومه تعمل حاجة إسمها سندات الخزانه بكذا مليار جنيه برضه بفايده . تبيعها للبنوك وللشركات وتاخد فلوسها تفك بيها زنقتها .
* * حسنين : يعنى ديون الحكومه على شكل أذون خزانه وسندات خزانه بفوائد .
= = = محمدين : الحقيقه علشان الديون بقت كبيره . أشكال الديون بقت متنوعه . ومعدتش الأذون والسندات كافيه لوحدها . يعنى عملت شهادات الإستثمار تلم بيها فلوس . وبتاخذ الودائع إللى عند صندوق توفير البريد وخدت فلوس صناديق التأمينات والمعاشات .
* * حسنين : وصلت كام الدين المحلى بتاعنا ؟
= = = محمدين : فى آخر شهر يونيو إللى فات بقت 889 مليار جنيه . وطبعا الرقم دا بيكبر كل شهر لأن عداد الفوائد شغال على القديم . علاوه على الديون الجديده . يعنى نسدد أذون ولا سندات حل ميعادها . ونطلع أذون وسندات جديده بدلها .
* * حسنين : طيب دى الديون المحليه . ياترى بقى الدين الخارجى حكايتة إيه . موش كنا قلنا لما دخلنا حرب العراق . الدول الكبيره أعفونا من الديون الخارجيه . وضغطوا على دول الخليج تشطب الديون إللى على مصر ليهم .
= = = محمدين : ساعتها عفونا من جزء من الديون الخارجيه موش كلها . وطبعا من وقتها فيه فوائد على الدين . وساعات نستلف تانى . وطبعا الدين كبر مره ثانيه . لحد ما وصل حوالى 34 مليار دولار فى شهر يونيو إللى فات . يعنى حوالى 192 مليار جنيه
ودى فلوس علينا لدول كثيره زى أمريكا وفرنسا واليابان . ودول عربيه ومؤسسات دوليه وإقليميه كنا مستلفين منها .
* * حسنين : يعنى عايز تقول 889 مليار جنيه دين محلى . و192 مليار جنيه دين خارجى . يعنى حسبة 1 تريليون و80 مليار جنيه مجموع الدين العام .
فيها إيه دى .. دا حتى الناتج المحلى بتاع مصر فى سنه واحده أظن إنه أكبر من كدا . وبعدين ما كل الدول مديونه . إنت ناسى إن إحنا دخلنا كام حرب ؟
= = = محمدين : فيها كتير يا حسنين يا خوى . تخيل لو فيه رب أسره بيصرف ألفين جنيه فى الشهر ودخله 1400 جنيه . كل شهر بيستلف 600 علشان يعرف يعيش . لحد ديونه ما كترت وبقت أقساط وفوائد الدين إللى عليه بتكلفه هى كمان 500 جنيه كل شهر . ممكن الراجل دا يصرف كويس على عياله ولا يعرف يسدد ديونه ؟
* * حسنين : طبعا صعب .. هو عارف أصلا يغطى مصروفاته الأصليه . علشان يسدد ديونه .
= = = محمدين : لو بصيت فى الموازنه بتاع السنا دى . حتلاقى مصروفات الحكومه 490 مليار جنيه . لكن إيراداتها 299 مليار بس . يعنى فيه عجز عايزه تستلفه السنا دى 191 مليار جنيه .
وزى أى رب أسره بيصرف على الأكل والشرب واللبس والمواصلات والتعليم والصحة . الحكومه عليها مصاريف أجور للموظفين بتوعها . وعليها تأمينات بتدفعها ودعم للسلع ومعاشات وجيش وأمن وتعليم وصحه وكبارى وطرق وصيانه .
* * حسنين : يعنى الحكومه بالهيلمان بتاعها والشنه والرنه مزنوقه زينا .
= = = محمدين : خد أرقام مصاريف الحكومه بتاع السنا دى حتلاقى : 117 مليار جنيه للدعم . و 95 مليار للمرتبات ما هى عندها حوالى 6 مليون موظف . و40 مليار للاستثمارات بتاع الكبارى والطرق والمستشفيات والمدارس وباقى المرافق . و29 مليار للصيانه وكتب المدارس والميه والنور والبنزين للمصالح الحكوميه وأدوية ولوازم المستشفيات .
عارف أكبر بند فى مصروفات الحكومه إيه ؟ . أقساط وفوائد الدين المحلى والأجنبى . دا بند واخد 173 مليار جنيه . متقسمه 91 مليار للفوائد بتاع الدين و82 مليار للأقساط بتاعته . يعنى زى ما أنت شايف دا أكبر بند فى مصروفات الحكومه .
* * حسنين : يعنى عايز تقول إن المصاريف إللى رايحه لفوائد وأقساط الدين ال 173 مليار أكبر من بند المرتبات . ومن البند إللى ها تعمل بيه كل المرافق طوال السنه . ومن الدعم اللى بتزلنا بيه .
= = = محمدين : علشان كدا الدين العام بتاع البلد هو عقدة الموازنه . زى ما أنت شايف الموازنه عليها فوائد وأقساط ب 173 مليار . وها تستلف 191 مليار جنيه جديده لسد العجز الجديد .
وطبعا السلف الجديد ها يكون له فوائد وأقساط السنه الجايه .ها تتضاف على أقساط وفوائد الديون القديمه . يعنى ها يكبر المبلغ المطلوب للفوائد والأقساط فى الموازنه الجايه . ودا ها يخلى الحكومه تستلف أكتر السنه إللى جايه . يعنى دوامه ما ها تخلص .
* * حسنين : علشان كدا دائما وزير الماليه لما نقوله زود العلاوه يقول ها جيب منين .
= = = محمدين : طبعا .. إذا كان موش عارف يدبر فلوس المرتبات ها يزودها إزاى ؟ وطبعا دا نفس السبب إللى بيخلى أى مشروع ممكن يخلص فى 3 سنين يخلص فى عشره . يعنى لو فيه مستشفى ولا طريق ولا كوبرى . عايز مليون جنيه علشان يخلص . يفضل الوزير كل سنه يخصص له مائة ألف جنيه بس .
* * حسنين : طب لما هى الحكاية كدا أمال ليه المؤتمرات والمهرجانات والرحلات والبعثات بتاع الريس والهانم وولى العهد ما بتنتهيش . ما يلموا الدور بقى . ويراعوا الحاله إللى إحنا فيها .
= = = محمدين : أى حد عنده عجز فى ميزانيته سواء رب أسره ولا شركة ولا دوله . قدامه سكتين للعلاج . إما يقلل مصاريفه . أو يزود ايراداته . أو يمشى فى السكتين مع بعض . إحنا بقى ما نقدرش على زعل الهانم . لازم تعمل قمة للمرأه فى أفريقيا ومنظمه للمرأه العربيه .وحركه دوليه للسلام وجمعية خدمات وغيره إشى كتب وإشى طفوله وإشى وفود جايه ووفود رايحه برا . طبعا دا كله علشان مصر ! هما بيقولوا كدا .
وكل وزير مروق نفسه عربيات آخر شياكه وسفريات ولابد ياخد معاه الصحفيين بتوع الوزاره . وبدلات له وللحبايب حواليه على حساب الموازنه المديونه . تصور عندنا 35 وزير . دا غير رؤساء الهيئات . علشان كدا إحنا ما شيين فى سكة واحده بس وهى زيادة الايرادات ..
نزود الضرائب . نعمل ضريبة عقاريه . نعمل رسوم ودمغات نرفع أسعار استخراج شهادات الميلاد وثايق الزواج . وكل وزير ولا محافظ ولا حتى رئيس هيئة تطلع فى دماغه فكره جبايه ينفذها على طول .
* * حسنين : يعنى إحنا اللى بندفع ثمن البغدده بتاع الكبار . هما يعيشوا فى قصور ويسافروا فى طايرات خاصة . ويعملوا مهرجانات . يقوم العجز بتاع الموازنه يزيد . فما يقدروش يحسنوا المرتبات ولا يزودوا مصاريف المرافق والخدمات . فنستمر نعيش فى الضنك .
وبدل ما يرحمونا ويسيبونا فى حالنا إللى يصعب على الكافر . يتفننوا فى أنواع جبايه جديده . ويفرضوا علينا جباية إضافيه مع كل معامله بنعملها مع أى جهه حكوميه . موش عارفين إن احنا بندفع إكراميات علشان نمشى أى مصلحه .
= = = محمدين : فيه خطر تانى . فاكر من شويه لما قلت لى : " وفيها إيه ما كل الدول مديونه " . وإن الناتج المحلى بتاعنا أكبر من الدين .
إذا كان مجموع الدين العام 1 تريليون و80 مليار . فالناتج بتاع مصر بالأسعار الجاريه 1 تريليون و150 مليار . يعنى نسبة الدين العام للناتج 94 % .
ولو قسمت الدين على الناتج المحلى بالأٍسعار الثابته ودى قيمتها 838 مليار جنيه . تطلع النسبة 129 % .
* * حسنين : موش فاهم تقصد إيه ؟
= = = محمدين : الدول الأوربيه قالت إن حد الأمان لأى بلد . إن نسبة الدين تكون فى حدود 60 % من الناتج . أظن سمعت عن مشكلة الديون بتاعة الدول الأوربيه خصوصا اليونان وأيرلندا والبرتغال وأسبانيا . إللى أثرها وصل العالم كله .
عارف نسبة الدين الحكومى للناتج وصلت كام السنه إللى فاتت فى الدول الأوربيه . فى بلغاريا 15 % ورومانيا 24 % وسلوفاكيا والتشيك 35 % . وفى الدانمرك 41 % والسويد 42 % وفنلندا 44 % وبولندا 51 % وفى أسبانيا إللى العالم خايف منها 53 % .
* * حسنين : أنا سمعت فى التلفزيون إن فيه دول أوربيه عدت حد الأمان .
= = = محمدين : الدول الأوربيه إللى تخطت نسبة الأمان عملت خطط تقشف السنا دى . علشان تنزل النسبة . لأن النسبه كانت وصلت السنة إللى فاتت 61 % فى هولندا و66 % فى أيرلندا و68 % بانجلترا .
و73 % فى ألمانيا و76 % فى البرتغال و78 % فى فرنسا والمجر . و96 % فى بلجيكا . تصور هما دولتين بس من بين دول الاتحاد الأوربى السبعة والعشرين إللى عدوا نسبة 100 % . ايطاليا 116 % واليونان 127 % . يعنى إحنا عدينا نسب الأمان . سمعت عن خطة تقشف عندنا لتنزيل النسبة زيهم ؟
* * حسنين : لكن أنا سمعت برضه فى التلفزيون إن النسبة فى مصر 55 % بس . دا حتى النسبة دى مكتوبه فى نشرات البنك المركزى .
= = = محمدين : أهو دا إللى إحنا فالحين فيه . نلعب ونزوق البيانات . عارف دى نسبة إيه ؟ دى نسبة الدين الحكومى بس للناتج . فى حين أن الدين الحكومى دا جزء من ثلاث مكونات للدين المحلى .
يعنى مع الدين الحكومى فيه دين الهيئات الاقتصاديه ودين بنك الإستثمار القومى . وطبعا فيه الدين الخارجى كمان . فلو المسؤل أمين مفروض يجمع كل أنواع الديون علشان النسبة تكون مضبوطه .
* * حسنين : يعنى المسؤلين بياخدوا جزء من الدين العام . ويقسموه على الناتج علشان الصوره تطلع حلوه . أقصد النسبة تطلع حلوه .
= = = محمدين : موش كدا وبس . فى سنة 2006 عملوا سندات بمديونية بنك الاستثمار القومى لصناديق المعاشات قيمتها 198 مليار جنيه . ومن وقتها نزلوا نسبة الدين المحلى الى الناتج بحوالى 11 % .
وكأنهم لما طلعوا السندات سددوا الدين . رغم إن العمليه هى مجرد تحويل الدين من جهة حكوميه الى جهة حكوميه ثانيه . يعنى زى ما بنك الاستثمار القومى تابع لوزارة الماليه فصناديق التأمينات تابعه برضه لوزارة الماليه .
* * حسنين : يعنى تلاعب وضحك على الدقون . وحلول على الورق . فينك يا صندوق النقد الدولى . تيجى تشوف إللى بيحصل لينا من المسؤلين بتوعك .